Writingspress statementsMENSAHE TI PANNAKIPAGKAYKAYSA PARA ITI CORDILLERA DAY 2011

MENSAHE TI PANNAKIPAGKAYKAYSA PARA ITI CORDILLERA DAY 2011

-

Prof. Jose Maria Sison
Mangidaulo , International League of Peoples’ Struggle
Abril 26, 2011

Iti okasyon ti Cordillera Day 2011, dakami iti International League of Peoples’ Struggle ket ipaduyakyak mi ti kapupudotan a panangkablaaw ti pannakikaykaysa iti amin a delegado ken naisangsangayan a bisita ken iti amin nga umili ti Cordillera, ti pangsapasap a nangsangaili a ti Cordillera People’s A lliance ken ti lokal a nangpasangbay a Kakailian Salakniban Tay Amin a Nagtaudan (KASTAN), Timpuyog dagiti Umili iti Lacub, Bantayan Ekolohiya ken Kinabaknang (Lacub People’s Federation for Ecological and Resource Protection).

Ited mi ti kangangatoan a pammadayaw iti Cordilera People’s Alliance ken dagiti umili ti Cordillera iti napasnek a panangselebrar da iti Cordillera Day manipud 1985 a naibasar iti immunan a Macliing Memorials (1980-1984), tapno ipaganetget ti panagkaykaysa ti umili ti Cordillera para iti panangsalaknib ti nainsigudan a daga ken iti pannakidangadang para iti bukod a pangngeddeng ken nailian a demokrasya.

Nai konsagrar ti Cordillera Day babaen iti naiparukpok a dara dagiti martir, nangrugi kenni Ama Macliing Dulag ken Pedro Dungoc a nangidaulo iti pannakisaranget laban iti pinondoan ti World Bank a Chico River Basin Hydroelectric Dam Project ni diktador Ferdinand Marcos. Daytoy nga aldaw ket tinawen a selebraran dagiti umili ti Pilipinas ken iti ballasiw taaw tapno parubruben ti kolektibo a memorya tayo ken pabaroen ti komitment tayo nga itultuloy ti dangadang para iti nailian a wayawaya, demokrasya, hustisya a panggimong ken panagrang-ay para iti interes dagiti umili.

Nabagas ti agdama a tema yo, Ibiag ti Naindaklan a Pakasaritaan ti Dangadang Tayo! Lumaban para iti Daga, Biag ken Dayaw. Mainaig ditoy, importante la unay a sentroan yo dagiti napudot nga isyu a kas iti panagminas, militarisasyon, ken pananglabsing iti kalintegan-tao. Dagitoy ket mangidadanes ken manggundaway iti umili ti Cordillera ken kasapulan a natibker ken militante a labanan dagitoy nga aktibo a katinnulong ti intero nga umili a Pilipino ken dagiti umili ti lubong.

Agarup sangamilyon nga ektarya wenno 51% ti kadagaan ti Cordillera ket sakupen dagiti lisensyado nga operasyon ken nakapila nga aplikasyon dagiti transnational corporations ken dagiti kakomplot da a Filipino. Mairaman da iti panaggamgam ti daga, dagiti kinabaknang a mineral, dagiti bakir ken karayan manipud iti umili tapno gamruden da ken iti proseso ket madadael ken ma-pollute ti aglawlaw a pakadangran dagiti nainsigudan a komunidad iti Cordilera kasta met kadagiti umili iti baba.

Kasilpo ti mining ti militarisasyon ken pananglabsing ti kalintegan-tao. Tapno lippiten ti panaglaban ti umili ken ipakat dagiti dadakkel a proyekto ti minas, indeploy ti estado ti uppat a regular a batalyon ken tallo nga espesya a batalyon ti Philippine Army iti luglugar a maminas iti Cordillera. Kas resulta, agraira ti aduan ken sistematiko a panaglabsing iti kalintegan-tao.

Rumbeng a maiyaramid ti Cordillera Day 2011 iti Lacub gapu ta daytoy a munisipalidad ket nabaknang iti balitok ken sumagmamano a kompanya ti minas, kas ti Golden Lake Mineral Resources ken ti Titan Exploration and Development Corporation, ket determinado a mangkali iti sumagmamano a lugar.  Importante a tumipon tayo iti umili ti Lacub iti dangadang da laban kadagiti kompanya ti minas ken ipakita kadakuada ti simpatya ken suporta tayo iti pannakilaban da.

Kanayon a mangted inspirasyon ti pananglagip ken panangipokus iti nabannuar a dangadang dagiti Tinggians ti Abra laban iti panang-logging ti bakbakit ti Cellophil Resources Corporation idi panawen ti diktadura nga US-Marcos. Manen, masapul nga adawen tayo dagiti leksyon manipud iti daytoy a nagballigi a panaglaban iti panangsango kadagiti nababara nga isyu a mangburburibor iti umili ti Cordillera iti agdama.

Umip-ipos kadagiti reaksyonaryo a nasyunal nga opisyal, ibagbaga dagiti sumagmamano nga opisyal iti probinsya ken munisipyo a ti minas ket mangted ti progreso ken panagrang-ay. Ingagara da a kalkaluban a dagiti lugar iti Cordillera kas iti Tuba, Itogon, Tublay, Kibungan ken Mankayan, a deka-dekadan a napalalo a naminas, ket awan maiparammag da no di ketdi nakaro a panagmirmiraut ken pannakaperdi ti daga. Kastoy met ti napasamak iti adu pay a mining areas kas iti Marinduque, Toledo idiay Cebu ken idiay Mindanao.

Ikarkari dagiti kompanya ti minas a tarimaanen da ti kalsada ti Lacub ken mangikabil da ti rangtay iti karayan Malanas. Siyempre aramiden da dagitoy tapno mapapardas ti operasyon da iti panagminas. Apaman a maibus da dagiti saanen a maisubli a rekurso a balitok, panawan dan a naperdi ti lugar kasta met dagiti napalalon a nausar a kalsada ken rangtay. Awan duma da kadagiti naruker a pulitiko a tinawen nga agtaktakaw ti kwarta a publiko a naisayangkat para iti panangibangon ti imprastruktura.

Dagiti proyekto iti minas ket kakuyog ti militarisasyon. Palikmutan dagiti dadakkel a semi-permanente a detatsment ti PhilippineArmy ti Lacub iti kabangibang a Lagangilang, Baay-Licuan ken Malibcong. Masansan a mangideploy ti Philippine Army kadagiti platun idiay Lacub a mangiyaramid iti makunkuna nga operasyon iti counter-insurgency. Idi 2008, kinontrol ti maysa nga Special Operations Team (SOT) ti 41st IB ti ili ti Talampac iti intero a tawen tapno buraken ti organisasyon ti umili.

Iti probinsya ti Abra, ti Philippine Army ken private armies dagiti naruker a pulitiko ket nakalawlawag a pareho nga agserserbi iti interes dagiti kompanya ti minas. Dua a batalyon ti 5th  Infantry Division ket nakadeploy ditoy – ti 41st IB iti amianan ken ti 50th IB iti abagatan. Nayon pay, adda dagiti counter-insurgency strike force, ti 52nd DRC (Division Reconnaissance Company) ken ti kompanya ti 77th IB, nga agserserbi kas kuerpo ti kadre para iti paramilitary a Civilian Armed Forces Geographical Units (CAFGU).

Ti sipaparang a misyon da ket buraken ti New People’s Army (NPA) ken palubusan a gamgamen dagiti kompanya, kas kadagiti dadakkel a kompanya ti minas, dagiti natural a rekurso ken dadaelen ti environment. Ngem dagiti nainsigudan nga umili ti Lacub ket determinado a mangilaban iti kalintegan da iti ansestral a daga ken papigsaen ti bileg da. Ipampannakkel da ti napaut a pakasaritaan ti dangadang da tapno salakniban ti daga, biag ken dayaw.

Agtultuloy a bibiagen da ti naindaklan a pakasaritaan da a sentral ti pinapel da iti naimballigian a panaglaban dagiti Tinggian kadagiti operasyon ti panagtroso ti Cellophil ti diktadura a Marcos. Kanayon a sentral ti pinapel da iti pananglapped iti nadumaduma nga administrasyon a mangiyaramid iti plano ni Marcos nga ikkan ti dam ti Binongan river. Situtured ti komunidad ti Buneg, iti partikular, a nanglapped iti maysa a lokal a warlord a mangsamsam iti babassit nga usok da.

Ammo tayo nga agballigi ti Cordillera Day 2011 iti panangamiris iti sitwasyon ti Cordillera iti agraraira a konteksto ti Pilipinas ken iti lubong. Kasta met a maitudo dagiti rebbengen ti Cordillera People’s Alliance manipud iti umiso a batayan ti panangadal yo iti sitwasyon iti Abra, Apayao, Kalinga,  Benguet, Ifugao, Mountain Province ken Baguio City.

Agnamnama kami a maiyaramid yo ti komprehensibo ken natadem a pannakaawat iti sitwasyon ken kadagiti karit iti Cordillera. Makatulong dagiti workshop iti regional autonomy ken bukod a pangngeddeng; panagminas: bassit ken dakkel; kalintegan-tao ken Oplan Bayanihan; climate change ken disaster management a mangitudo ken mangsango kadagiti isyu.

Mangnamnama kami iti kangatoan a balligi iti panangiyaramid yo iti Unity Pact babaen iti panangisilpo iti kinasaririt dagiti elders ken dadaulo ti tribu, ti dinamismo dagiti organisasyon masa ken dagiti kinalaing manipud iti nadumaduma a gunglo. Importante unay a dagiti elder ken dadaulo ti tribu ti mangimaton iti panangbukel ti multilateral nga unity pact a manglaban iti panangperdi ti minas ken pananglabsing iti kalintegan-tao. Iti sango ti panangpadas ti gubyerno nga aramiden ti maikatlo nga organic act para iti Cordillera autonomous region, importante met a mangiyaramid kayo ti nalawag ken natibker a posisyon maipanggep iti pudno a regional autonomy ken bukod a pangngeddeng.

Mangnamnama kami a babaen iti Cordillera Day 2011 ket mabaelan yo nga agsuma ti sitwasyon ken dagiti kapadasan iti dangadang, agadal manipud iti positibo ken negatibo a leksyon, agkonsolida kadagiti balligi, rimbawan dagiti pagkurangan ken itudo dagiti rebbengen tapno mapapigsa ti kabaelan ken kapasidad a lumaban tapno magun-od dagiti daddadakkel pay a balligi. Iti kasta, umaddang iti baro ken nangatngato a tukad ti dangadang dagiti umili ti Cordillera para iti bukod a pangngeddeng ken nailian a demokrasya.###

Latest news

Bio-data of Jose Maria Sison as public figure

Bio-data of Jose Maria Sison as public figure

Jose Maria Sison talks and meets with Philippine presidents

Jose Maria Sison talks and meets with Philippine presidents

Jose Maria Sison meets and talks with Prime Minister Kyell Magne Bondevik of the Royal Norwegian Government

In the course of GRP-NDFP peace negotiations in Norway , Jose Maria Sison meets and talks with Prime Minister Kyell Magne Bondevik of the Royal Norwegian Government.

Jose Maria Sison receives the Southeast Asia WRITE Award

The literary award is considered the most prestigious in Southeast Asia. The awardees are nominated by national writers' organizations

BOOKS BY PROF. JOSE MARIA SISON, 1961-2022

Since 1961, more than 50 books written by Jose Maria Sison have been published in English, Filipino and other languages. The books listed hereunder chronologically are mostly available from libraries of major Philippine, US and West European universities, Popular Bookstore in Manila and NDFP International Information Office in Utrecht, The Netherlands.

Decision on the petition for proscription against the CPP-NPA as terrorist organizations filed by the DOJ on 21 Feb 2018 with the RTC branch...

The Program of the CPP which is also synonymous with “Plan of Action”, can be construed as the respondent organizations’ “purpose for being,” or the very reasons for its establishment. A perusal of the foregoing Program, consisting of lofty ideals readily shows that the CPP-NPA is organized or exists, not for the purpose engaging in terrorism.

Must read

Bio-data of Jose Maria Sison as public figure

Bio-data of Jose Maria Sison as public figure

Jose Maria Sison talks and meets with Philippine presidents

Jose Maria Sison talks and meets with Philippine presidents

You might also likeRELATED
Recommended to you